ពិតជាអស្ចារ្យាមែន! ភ្ញៀវទេសចរជាតិ និងបរទេសយ៉ាងច្រើនកុះករ នាំគ្នាទៅទស្សនា និងផ្តិតយកព្រឹត្តិការណ៍ថ្ងៃរះចំកណ្ដាលកំពូលប្រាសាទអង្គរវត្ត
សៀមរាប៖ បន្ទាប់ពីខកខានមិនបានទៅទស្សនាព្រឹត្តិការណ៍ថ្ងៃរះចំកណ្ដាលកំពូលប្រាសាទអង្គរវត្ត ឬហៅថា«សមរាត្រី» អស់រយៈពេល២ឆ្នាំកន្លងមក នៅព្រឹកថ្ងៃទី២១ ខែមីនា ឆ្នាំ២០២២នេះ ភ្ញៀវទេសចរជាតិ និងបរទេសយ៉ាងច្រើនកុះករ បាននាំគ្នាទៅទស្សនាព្រឹត្តិការណ៍ថ្ងៃរះចំកណ្ដាលកំពូលប្រាសាទអង្គរវត្ត ដែលបានចាប់ផ្តើមរះពីម៉ោង៦ និង៣០នាទីព្រឹក។
លោក អ៊ឹម សុខរិទ្ធី បុរាណវិទូនៃអាជ្ញាធរជាតិអប្សរា បានឱ្យដឹងថា ព្រឹត្តិការណ៍នេះ បានកើតឡើងពីរដង ក្នុង១ឆ្នាំ គឺនៅថ្ងៃទី២១ ខែមីនា និងនៅថ្ងៃ២២ ខែកញ្ញា។ លោកបានពន្យល់ពីព្រឹត្តិការណ៍ថ្ងៃរះចំកណ្តាលកំពូលអង្គរ ឬសមរាត្រីនេះថា គឺជាពេលវេលា ដែលពេលថ្ងៃនិងពេលយប់ មានរយៈពេលស្មើគ្នា ដោយខុសពីខែធម្មតាខ្លះ យប់មានរយៈពេលវែងជាងពេលថ្ងៃ ឬថ្ងៃមានរយៈពេលវែងជាងយប់ ហើយជាព្រឹត្តិការណ៍ទូទៅរបស់ផែនដី ដែលតែងតែកើតមាននៅក្នុងពិភពលោក។
លោកបន្ថែមទៀតថា ប្រទេសកម្ពុជា មានព្រឹត្តិការណ៍សមរាត្រីកើតឡើងនេះ មិនមែនជារឿងចៃដន្យនោះឡើយ ព្រោះវាគឺជាលក្ខណៈពិសេសរបស់បុព្វបុរសខ្មែរ ដែលរៀបចំស្ថាបត្យកម្ម ប្លង់របស់ប្រាសាទទុកមុន ក្នុងបំណងតម្រូវតាមបាតុភូតធម្មជាតិ ដែលបង្កើតជាព្រឹត្តិការណ៍ថ្ងៃរះចំកំពូលកណ្ដាលនៃប្រាសាទអង្គរវត្តនេះឡើង៕
ប្រភព៖ AKP ខេត្តសៀមរាប
